"QUERO COLAPSAR AO TEU LADO"

LA RUEDA
“Quero colapsar ao teu lado” busca o equilibrio entre o teatro docu­mento e a autoficción, a utopía e a distopía, a reflexión, a acción, a emoción... e a poesía. Unha creación que parte da necesidade de sentir compañía e afecto fronte aos datos que presentan un futuro cada vez máis incerto: Desertificación e degradación do chan fértil, entulleiras con residuos plásticos no outro lado do planeta, incendios que un día poden chegar ata a túa propia casa, sistemas de regadío que desafían a escaseza de auga, refuxiadas climáticas, aumento da temperatura global... E o tempo, como unha laxa. Estamos preparade@s?
Tres amig@s deciden emprender unha viaxe cara aos claroscuros da crise eco - social. Ell@s mism@s servirán de canle para ofrecer teste­muños de activistas globais, pequenos proxectos locais, afectade@s, personaxes históricos ou mesmo familiares... Pero tamén achegarán reflexións, reaccións emocionais, ilusións, medos, e confesións… Como nos relacionamos desde o individual e desde o colectivo para convivir co que está por chegar ou afastar a ameaza? Cal é a maneira de activar e reactivar novas formas de reconstrución e reparación? “Quero colapsar ao teu lado” é un intento de poñer luz onde apenas a hai. Unha aposta conciliadora e realista sobre o futuro do planeta e a humanidade. Un espazo de encontro entre seres sensibles. Un movemento vital. Unha necesidade.