La Celestina revive hoxe na pel de Charo López, xunto a dous dos membros da compañía Ron Lalá: Yayo Cáceres (dirección) e Álvaro Tato (dramaturxia). “Ojos de auga” reúne os máis inesquecibles pasaxes da obra inmortal de Fernando de Rojas. Un monólogo sobre o tempo gozado e perdido, o sexo como pracer e arma, a beleza como agasallo e condena, a alegría de vivir a pesar de todo. Celestina leva nos seus ollos o prezo da beleza perdida, a independencia cos dentes, a intelixencia oculta. Celestina é o poder feminino na sombra, e tamén a vítima da súa propia astucia. Celestina fainos rir, chorar, pensar, soñar... e lévanos na corrente dos seus ollos de auga. Celestina é clásica, é actual, é eterna. A bruxa que cuestiona as nosas convencións, a vella que nos rexuvenece, a mestra que aprende dos nosos erros. Celestina é presente porque é libre. Pinga a pinga, bágoas de risa e emoción nos “Ojos de auga” de Charo López, que dá vida e voz a un dos máis contraditorios, frescos, fondos e vitais personaxes da literatura universal. Escondida nun mosteiro tras os acontecementos relatados por Fernando de Rojas na súa obra inmortal, Celestina, mítica feiticeira, alcahueta, tecedora de burlas e enganos, rompe o seu voto de silencio ante as monxas de clausura para lembrar os amores de Calisto e Melibea, os lios dos criados Sempronio e Pármeno, o desexo e a rebeldía de Elicia e Areúsa, o choro de Pleberio... e, sobre todo, a súa propia liberdade gañada a pulso. Ao longo dun día repartido en tres estancias, no horto, a cociña e o tear dese espazo metafórico-, Celestina vai ganduxando todo o humor, a alegría, o desexo, a morte e a humanidade que respira o clásico orixinal. Gargalladas, complicidade, poesía, e o testemuño divertido, cru e quente dunha vida que se fai a si mesma a pesar das convencións sociais, prexuízos masculinos, censuras morais e relixiosas... Unha vida ao lado das bruxas. Creada a partir de diversos fragmentos da Celestina, “Ojos de auga” desenvolve os grandes temas da obra orixinal que enlazan directamente co noso tempo, e explora a un personaxe tan fascinante como contraditorio, en busca dos seus segredos máis profundos.
