REAL FILHARMONÍA DE GALICIA “EXSULTATE JUBILATE”

   A Real Filharmonía de Galicia inicia o seu camiño en Santiago de Compostela en 1996.
   Con sede no Auditorio de Galicia e xestionada polo Consorcio de Santiago, mantén unha tempada de abono estable. Ao longo da súa traxectoria acompañárona os máis destacados directores, cantantes e instrumentistas do mundo. Realizou xiras e concertos en escenarios de Alemaña, Austria, Francia, Brasil, Arxentina, Cuba e Portugal, país co que mantén unha estreita colaboración. Comprometida co territorio ao que presta servizo, actúa asiduamente por toda Galicia.

“EXSULTATE JUBILATE”:
    O presente e o pasado danse a man neste programa con obras contemporáneas e do gran repertorio. En Saturnal, de Manuel Balboa, aflora a estética intimista e o uso tan persoal das cores tímbricas que impregnan as obras orquestrais do músico coruñés, falecido no 2004. Galicia está tamén presente en Lúa descolorida, peza para voz e orquestra composta polo arxentino Osvaldo Golijov sobre o poema de Rosalía de Castro, escrita cun exquisito sentido lírico. A voz feminina protagoniza tamén o motete mozartiano Exsultate Jubilate, unha das pezas vocais máis festivas e coñecidas do salzburgués, escrito orixinariamente para castrato. O concerto remata coa Sinfonía núm. 6 de Franz Schubert, unha das obras máis italianizantes do mestre vienés que nunca chegou a escoitala en vida.

PROGRAMA
        

MANUEL BALBOA (1958-2004)

Saturnal

 

OSVALDO GOLIJOV (1960)

Lúa descolorida*

 

WOLFGANG AMADEUS MOZART (1756-1791)

Exsultate Jubilate, K.165 (158a)

Exsultate, jubilate Recitative: Fulget amica dies Tu virginum corona Alleluja!

Carmen Buendía, soprano

 

II PARTE

FRANZ SCHUBERT (1797-1828)

Sinfonía núm. 6 D.589 en Do Maior

Adagio; Allegro Andante Scherzo: Presto - Più lento Allegro moderato