Mark Rothko, un dos grandes representantes do chamado Expresionismo Abstracto, enfróntase ao que quizais é o seu maior reto profesional e o seu peor dilema ético: pintar unha serie de murais, extraordinariamente ben pagos, que deberán decorar o elitista restaurante Four Seasons de Nova York. É o principio da decadencia, pero o tormentoso creador négase a aceptar que un novo movemento, o Pop Art, axexa disposto a pisar o seu legado tal e como a súa xeración fixo cos cubistas que a precederon. Baixo a incisiva mirada do seu mozo axudante, e disparando palabras como dardos, Rothko pinta un certeiro retrato da súa visión da arte, da vida e da morte á que non quixo esperar. Galardoada con seis premios Tony (incluído o de Mellor Obra) e representada no medio mundo desde Chile até Japón, "Rojo" constitúe o maior éxito teatral do dramaturgo e guionista John Logan. É a primeira vez que se representa en escenarios españois.
